ვახტანგ ჟვანიას საპატიო ჩხოროწყუელის წოდება მიენიჭა

ვახტანგ ჟვანია — ქართველი იურისტი, კონსტიტუციური სამართლის სპეციალისტი და პროფესორი — 2025 წლიდან სსიპ „იუსტიციის სახლის“ თავმჯდომარის თანამდებობას იკავებს. მას მინიჭებული აქვს საპატიო ჩხოროწყუელის წოდება. იგი ცნობილი საზოგადოებო-პოლიტიკური მოღვაწის, არნოლდ ჟვანიას (რომელიც ჩხოროწყუს ხელმძღვანელი და საქართველოს პარლამენტის წევრი იყო) ოჯახიდანაა.

ვახტანგ ჟვანია 1987 წლის 2 აპრილს თბილისში დაიბადა. მან უმაღლესი განათლება ივანე ჯავახიშვილის სახელობის თბილისის სახელმწიფო უნივერსიტეტში, სამართალმცოდნეობის სპეციალობით მიიღო, რის შემდეგაც სწავლა სამართლის მაგისტრატურასა და დოქტორანტურაში გააგრძელა.

მისი პროფესიული საქმიანობა მრავალფეროვანია და როგორც აკადემიურ, ისე საჯარო სექტორს მოიცავს. სხვადასხვა დროს იგი ხელმძღვანელობდა ა(ა)იპ „კონსტიტუციონალიზმის კვლევისა და ხელშეწყობის რეგიონულ ცენტრს“, იყო განათლების ხარისხის განვითარების ეროვნული ცენტრის აკრედიტაციის ექსპერტი და საქართველოს პარლამენტის იურიდიულ საკითხთა კომიტეტთან არსებული სამეცნიერო-საკონსულტაციო საბჭოს წევრი. გარდა ამისა, იკავებდა სახელმწიფო უსაფრთხოების სამსახურის სასწავლო ცენტრის ადმინისტრაციის უფროსის პოზიციას, ხოლო 2022 წლიდან საქართველოს იუსტიციის სასწავლო ცენტრის დირექტორის მოვალეობას ასრულებდა.

პარალელურად, ვახტანგი აქტიურ აკადემიურ საქმიანობას ეწევა. 2021 წლიდან იგი საქართველოს ტექნიკური უნივერსიტეტის სამართლისა და საერთაშორისო ურთიერთობების ფაკულტეტის პროფესორია, ხოლო მისი სამეცნიერო ინტერესები ძირითადად კონსტიტუციურ სამართალსა და საჯარო მმართველობის აქტუალურ საკითხებს უკავშირდება.