ჩხოროწყუში პატრონიანი ძაღლების უფასო სტერილიზაცია-რეგისტრაციის პროგრამა იწყება

სურსათის ეროვნული სააგენტოს მიერ დაფინანსებული სახელმწიფო პროგრამის ფარგლებში, სამეგრელო-ზემო სვანეთის რეგიონში პატრონიანი ძუ ძაღლების უფასო სტერილიზაციისა და რეგისტრაციის პროცესი დაიწყო.

ჩხოროწყუს მუნიციპალიტეტის მერიის ინფორმაციით, ადგილობრივ მოსახლეობას სრულად უფასო ვეტერინარული მომსახურების მიღება ამ კვირის პარასკევს, 3 ივლისს შეეძლება. პროცედურები ჩატარდება ბაზრის მიმდებარე ტერიტორიაზე (გობეჩიას პირველი შესახვევი).

პროგრამის ფარგლებში, ძაღლები გაივლიან სტერილიზაციას და პარალელურად დარეგისტრირდებიან შინაური ცხოველების ერთიან ელექტრონულ ბაზაში.

დაგეგმილ ღონისძიებას ეხმაურება ვეტერინარი ლევან ჯალაღონია, რომელიც სპეციალური ვიდეომიმართვით მოუწოდებს მოსახლეობას, იაქტიურონ და არ გაუშვან ეს შესაძლებლობა ხელიდან:

„გთხოვთ, გაასტერილოთ თქვენი ძაღლები, რათა არ მოხდეს ცხოველების უკონტროლო გამრავლება, რაც უარყოფითად მოქმედებს როგორც თავად ცხოველთა კეთილდღეობაზე, ასევე მოსახლეობაზე. სურსათის ეროვნული სააგენტოს ეს გადაწყვეტილება ნამდვილად იმსახურებს მოწონებას და ჩემს სრულ მხარდაჭერას,“ – აღნიშნავს ლევან ჯალაღონია.

მნიშვნელოვანია გავითვალისწინოთ, რომ 2027 წლიდან შინაური ცხოველების სავალდებულო რეგისტრაციის მოთხოვნის შეუსრულებლობის შემთხვევაში, კანონმდებლობით გათვალისწინებულია შესაბამისი ფულადი ჯარიმები. მერია მოუწოდებს მუნიციპალიტეტის მოსახლეობას, დროულად ისარგებლონ აღნიშნული სახელმწიფო პროგრამით.

საკონტაქტო ინფორმაცია და ვიზიტის დასაჯავშნად წინასწარი ჩაწერა ხდება შემდეგ ნომრებზე: 📞 544 448 959 📞 597 239 980