შოთა წურწუმია ლექსი მეგრულ ენაზე მონატრებული მუმა

ლექსი მეგრულ ენაზე მონატრებული მუმა კითხულობს ავტორი შოთა წურწუმია
ამდღა 28.10.2021 მუაჩქიმი 84 წანერი იუაფუდ💖
. . . . . . . . . . . .
მონატრებული მუმა
სოდგია იბდენი, მუშენი გებჸუნს, თე მა:
თირი, ბორია, ვალი, გურგინი დო ჭვემა…
მთელი სერს ზღირთანდ, ართი ვეგნუღალ ღუმა
დო მოძირდ მოხუცებული მუმა.
ჩილამურით თოლიში ლაგვანი დალუ,
გელქია, ხელეფი ქდომვალუ.
ასე ფიფრქენქ, ჭუმანი მუჭო იბდა,
ქმობნატრებუ, ჩქიმი სკვამითოლამი დიდა.
ბაღანობა, ჩქიმი დალეფი დო ჯიმა,
ჯოღორი, ოზე, გოკარკუნტელი ხვიმა…
პეულეფით მოქუქუჩელი ორთა,
მაჭირხოლიში მუში ნარჩქვანშა დორთა.
სუნჯელი დოლოს კუჩხიუჩაფლეთ რულა,
ორო, ცხიმური ქარსამს გინოღულა.
ღორინთიში ხეთ ინნახანტა გურშა,
ჩქიმი სკვამი ხობწყარი, ოჩხომური დო სქურჩა…
ოდაბადე, ჩქიმი ტიბუ გარაგადუ,
სოთ ეფრჩქინდინი, იმენდი თიშით მარდუ…
მინიშა იბიბრქ, მინი გერიცალო ბჸურა…
დო მუკმუკი, ჭიჭე დო დიც ლურა.
თანდუ, მასქური აშარხიალ ლანჯეფს,
დობღურუქუნი ეგებ ქმიბსვანჯენი.
გოკურცხ იფრელქ, ლანჭას გოთხოზ კუმა,
ბგრძნენქ იკილოთ მოხუცებული მუმა.
შურიში მორსხეთ მი იბნატრა შხვა მა…
დიდაში ჰამო ფერაფა დო ხვამა.
ირჩხუ იფრელი, გიანტირენი ზღირთანს,
ორთა კინე მუშობურათ ირთანს.
მიჩქ, ცას ხოლო ვაჩმერცხიებუ თე მა:
ჸინი, ბორია, ვალი გურგინი დო ჭვემა…